«VÍSCERA» – ASELAS
Nesta VIII edición dende o festival queremos seguir apoiando os proxectos galegos emerxentes.
Neste ano contaremos ca residencia da peza VÍSCERA da compañía ASELAS.
A residencia levarase a cabo no Centro Xove da Almáciga e no Auditorio de Galicia durante a semana do Festival (Do 2 ó 7 de Setembro) e se mostrará na Praza de San Martín Pinario o Sábado 7 ás 17:30 .
«Víscera» trátase dunha peza de danza contemporánea creada polas bailarinas Loaira Lázare e Lucía González que comezou a crearse no 2021 e que foi finalista no Xuventude Crea no ano 2023. A peza explora a creación conceptual arredor da temática ecofeminista empregando a técnica do flying low e a improvisación, enmarcándose, do mesmo xeito, nas novas tendencias experimentais no ámbito da danza contemporánea da última década. «Víscera» funde danza e interpretación para construir unha narrativa cun ton de denuncia. Para conseguilo, empréganse constantes musicais, poéticas, coreográficas e escenográficas que fan referencia ó estómago, ó oco e ó baleiro. As constantes escenográficas tamén colaboran na construción simbólica dese “muro” encarcelador imposible de gatuñar. Deste xeito, a peza busca ir desdibuxando os movementos ata completar un proceso de animalización final, unha forma de sacar a carraxe visceral acumulada.
En palabras de Luna Miguel: “…debemos abrazar as nosas coxas porque só deste xeito se entende o abrazo. Agora ensíname tí a ser tan mansa…e eu contareiche por que os homes nos matan ”[trad.].
Idea Creativa: Loaira Lázare.
Coreografía: Lucía González Castro.
Interpretación: Loaira Lázare, Lucía González Castro, Ziggi Iglesias.
Duración: Por determinar
Can Cun Quinqué 